En la suya sentencia de 15 de setiembre de 2.021 lo Tribunal Supremo ha confirmato la condena a 18 anyos y 2 meses de garchola pa un hombre que maltractó, controló y menazó a la suya parella y violó a la filla menor d’edat d’esta.
Los feitos que ha tenito que estudiar lo Tribunal Supremo pasoron en A Coruña en 2018. Lo condenato, consumidor de alcohol y cocaína, empecipió a controlar lo telefono mobil d’a parella suya a la vegada que la insultaba y menazaba. En una ocasión plegó a decir-le”Te voi a ixarrallar a tu y a filla tuya en un cantón”. Bell que la suya parella no yera en casa aproveitó pa violar a la filla d’esta a punta de cutiello: la menor ya padeixeba alavez depresión per haber estato victima d’unatro delito sexual, ell i sabeba.
Lo novedoso d’esta sentencia ye que ha establito un “abecedario” con 27 caracteristicas d’o que ye lo maltracto habitual:
A) Con lo maltrato habitual lo bien churidico que proteche l’articlo 173.2 CP ye la pacifica convivencia entre personas vinculatas per lazos familiars u estreitas relacions d’afecto u convivencia.
B) En la mayoría d’as ocasions la sola preba con fuerza pa poder condenar a l’acusato ye lo testimonio d’a victima, per lo que no se puet excluyir la suya valoración alegando la dubda que esta siga precisament la unica preba.
C) Con lo maltracto habitual se practica un clima de insostenibilidat emocional en la familia fendo servir violencia psicolochica de dominación dende la violencia fisica, verbal y sexual, mirando de tresladar-la a la resta de miembros d’a familia.
D) Lo maltractador habitual practica y manifiesta exercendo la violencia pa la sumisión psicolochica d’os miembros d’a suya familia.
E) Lo maltractador habitual desarrolla d´esta manera una hierarquización d’a violencia familiar.
F) Lo que se sanciona en lo maltracto habitual ye la mesma habitualidat que suposa un “plus” de perversidat con a reiteración d’estos comportamientos.
G) La doctrina entiende que lo maltracto habitual en la violencia domestica ye un delito autonomo que lo suyo bien churidico ye la integridat moral d’a victima. Este delito puet manifestar-se tanto fisica como psicolochicament, causando muitas vegadas en las victimas més mal psicolochico que fisico, ya que en muitas ocasions no rematan de percibir que son estando victimas, per ixo la no denuncia y la permanencia d’as agresions en lo tiempo provocan grieus daños en la psique d’a victima.
H) Per lo que fa a lo concurso de delitos entre lo maltracto habitual (articlo 173.2 CP) y lo maltracto individual (articlo 153.1 CP), la doctrina recuerda que lo primero conserva la suya autonomía frent a atros tipos que resulten d’os actos violentos que repetitos, a fin de cuentas constituyen la suya esencia.
I) Lo delito de maltracto habitual se consuma quan este se manifiesta de manera habitual provocando una convivencia insoportable pa la victima, que vive y alienta en una situación d’espanto, depresión y ansiedat, temendo mesmo per la suya vida. Ixo implica per tanto per parte d’o maltractador un claro desconoiximiento d’a dignidat d’a muller.
J) La conducta que castiga l’articlo 173.2 CP ye la forma d’actuar y de comportar-se de manera habitual en la qual la violencia ye de contino present, creyando asinas una situación de permanent dominación sobre las victimas, a qui atemoriza impedindo-les lo libre desembolique d’a suya vida.
K) En los casos de maltracto habitual que se aporlarga en lo tiempo puet estar dificil que la/s victima/s puedan concretar fechas u recordar con detalle, estrimo provocato per lo estato permanent de maltracto, pero en tractar-se d’una conducta repetitiva esto no provoca indefensión a l’acusato.
L) La habitualidat no se refiere a un numero concreto d’actos ni de denuncias, sino a un clima de dominación u intimidación, imposición y desprecio sistematico descrito en los feitos prebatos.
M) Lo determinant pa parlar de habitualidat ye la creyación d’una atmosfera de superioridat y dominio enta la victima per la repetición d’actos de violencia psiquica u fisica.
N) Esta habitualidat responde més a un concepto criminolochico social que a un churidico formal.
Ñ) Lo maltracto habitual, tot y que afecte a quantas victimas chenera un solo delito.
O) Lo tipo de l’articlo 173.2 CP s’acerca a la categoría de delito d’estato en los quals lo suyo resultato no apareixe vinculatu a una persona en concreto, sino que per medio d’este clima de violencia, subchección y dominación l’agresión se prochecta sobre totz los que, independientment d’o suyo numero s’haigan quedau encletatos en lo suyo cerclo.
P) Con lo maltracto habitual s’exerce un ambient infernal y irrespirable que embolicará la convivencia con actos de violencia endrezatos en lo tiempo, resultando mesmo indiferent que bell d’estos hesen estato ya enchuchatos.
Q) Lo numero de personas dreitament afectatas per este clima violento, la freqüencia con la qual se repitan los actos de violencia, la naturaleza concreta d’estos comportamientos, u lo mal que estos actos de dominación puedan provocar en los demés integrants d’a unidat familiar, ye lo que servirá como parametro pa avaluar los indicadors y l’alcance d’a culpabilidat d’o suyo responsable.
R) Lo maltracto habitual se fa con unas caracteristicas d’especial crueldat en l’autor que en casa suya exerce un maltracto aporlargado en lo tiempo, agreviando lo sufrimiento d’as victimas de violencia de chenero u domestica perque no se tracta d’una tercera persona, parlamos d’a parella d’a victima, d’o pai d’estas.
S) Lo maltracto habitual fa un mal contino y continato d’o qual la/s victima/s tienen la percepción que no pueden salir d’ell, provocando situacions d’espanto y mesmo la sensación de no poder denunciar.
T) Lo maltracto habitual fa plegar a la victima a un punto limite a partir d’o qual ya no puet endurar mes actos de violencia enta ella, y en ocasions enta los suyos fillos.
U) Lo retardo d’a victima en denunciar la suya maltracto no puet tener-se en cuenta pa minimizar la suya credibilidat, ya que este silencio ye precisament una d’as caracteristicas d’os grieus daños que provoca lo maltracto habitual.
V) L’anterior va unito a que quan la victima a la fin decide denunciar u trencar la relación con lo suyo agresor, se pasa a un escenario d’incremento grieu d’o risco d’a vida d’a victima y que puet orichinar, asinasmesmo, actos de violencia vicaria.
W) En lo maltracto habitual no cal entender que la inexistencia de denuncias previas signifique que la declaración d’a victima siga no cierta u inexacta u mesmo que falte a la verdat, perque la inexistencia de denuncias previas no ye un requisito exichito pa la valoración d’a preba d’a victima d’este tipo de delitos.
X) A la fin quan la victima consigue denunciar los malos tractos dimpués d’un feito de gravedat no altera la suya credibilidat, u ye obvio que la relación que mantien con lo suyo no siga buena, pero ixo no significa que esta actúa dende lo resentimiento, la quimera u que menta.
Y) L’articlo 173.2 CP tien la misión especifica d’impartir un mayor reproche penal a la conducta tant repugnant d’o maltracto reiterato.
Z) La relación de sumisión psicolochica puet plasmar-se en grieus secuelas psiquicas que provocan la paralización de prener decisions libres a la victima ya que esta no ye conscient que ye estando victimizata, perque la dominación y subchugación d’o suyo agresor le prive de salir d’o ciclo de violencia habitual que exerce l’autor.
@dslloadvogau
Z) La relación de sometimiento psicológico puede plasmarse en graves secuelas psíquicas que provocan la paralización de tomar decisiones libres a la víctima ya que ésta no es consciente de que está siendo victimizada, porque la dominación y subyugación de su agresor le impide salir del ciclo de violencia habitual que ejerce el autor.
@dslloadvogau